ደቡብ አፍሪካዊቷ የሕግ ባለሙያ ናቪ ፒላይ ዓለም አቀፍ ሕግን በማስፋፋታቸው የኖቤል የሰላም ሽልማት ተበረከተላቸው
19:50 09.10.2026 (የተሻሻለ: 19:54 09.10.2026)
© telegram sputnik_ethiopia
ሰብስክራይብ
ደቡብ አፍሪካዊቷ የሕግ ባለሙያ ናቪ ፒላይ ዓለም አቀፍ ሕግን በማስፋፋታቸው የኖቤል የሰላም ሽልማት ተበረከተላቸው
ደቡብ አፍሪካዊቷ የሕግ ባለሙያ ናቫኔተም "ናቪ" ፒላይ ሰላምን እና ዓለም አቀፍ ሕግን ለማስፋፋት ላደረጉት ጥረት የኖቤል የሰላም ሽልማት አሸናፊ መሆናቸውን የኖርዌይ የኖቤል ኮሚቴ በኦስሎ ባካሄደው ይፋ ማድረጊያ መርሃ ግብር አስታውቋል።
ፒላይ በሩዋንዳ ዓለም አቀፍ ወንጀለኞች ችሎት እና በደቡብ አፍሪካ ከፍተኛ ፍርድ ቤት በዳኝነት ያገለገሉ ሲሆን በተያዙት የፍልስጤም ግዛቶች ላይ የተቋቋመውን የተባበሩት መንግሥታት የመርማሪ ኮሚሽን በሊቀመንበርነት መርተዋል።
እ.አ.አ ከ2008 እስከ 2014 ድረስ የተባበሩት መንግሥታት የሰብዓዊ መብቶች ከፍተኛ ኮሚሽነር ሆነው አገልግለዋል።
የደቡብ አፍሪካው ፕሬዝዳንት ሲሪል ራማፎሳ በሰጡት መግለጫ "የዳኛ ፒላይ የኖቤል ሽልማት አሸናፊ መሆን በደቡብ አፍሪካ እና በዓለም ዙሪያ ለሚገኙ ህዝቦች ሰላምን ለማጠናከር፣ የሰውን ልጅ ክብር ለማስጠበቅ እና ተስፋን ለማንገስ ያበረከቱትን ተራማጅ አስተዋጽኦ እንድናከብር ያስችለናል" ብለዋል።
በፒላይ የሙያ ሕይወት ጉዞ ውስጥ ሰብዓዊ እና ፍትሐዊ አገልግሎታቸውን የሚያስተሳስር በዘመን ዥረት የተዘረጋ ማዕከላዊ እውነታ መኖሩን ኮሚቴው ጠቅሷል፡፡
ይህም ኔልሰን ማንዴላን እና የአፓርታይድ ስርዓትን የተቃወሙ በርካታ ግለሰቦችን በጥብቅና ከማገልገል የጀመረው የቀደመ ሥራቸው እስከ ዘመናችን ታላላቅ ዓለም አቀፍ የፍርድ ቤት ክሶች ድረስ በዳኝነት ያከናወኑትን አገልግሎት እንደሚያጠቃልል ተመላክቷል።
"ዳኛ ፒላይ እንደ ቺፍ አልበርት ሉቱሊ፣ ሊቀ ጳጳስ ዴስሞንድ ቱቱ፣ ፕሬዝዳንት ማንዴላ እና የቀድሞው ፕሬዝዳንት ፍሬድሪክ ዊሊያም ዲ ክለርክ ሁሉ ደቡብ አፍሪካውያን ለሰላም፣ ለፍትሕ እና ለሰብዓዊነት ዕድገት ያላቸውን የጎላ ተፅዕኖ በማሳየታቸው እንኮራባቸዋለን" ሲሉ ራማፎሳ አክለው ገልጸዋል።
ስፑትኒክ ኢትዮጵያ | መተግበሪያ | X
